تحذير || أحدث طرق النصب على المواطنين ( بياعين الوهم )
تحذير من اللي بيقفوا بعد بوابات الطريق الصحراوي وخاصتا الجديدة منها
تحذير من اللي بيقفوا بجوار بنزينه جديدة
يقابلك مجموعة مندوبين محترمين لبسين بدل وحاجات كده اخر شياكة
مساء الخير يا فندم
مساء النور
اخبار الطريق اية
تمام كويس
في اي مشاكل في الطريق
لا مفيش تمام
اتفضل حضرتك اخدش هنا لو الكارت فاضي هتاخد خمسين لتر ولو في جائزه هتاخدها من مقر الشركة
المهم خدشت الكارت طلع مكتوب فيه خمس كوبونات سحب وجائزه فوريه
قالي ميكرو ويف
مجموعة دهب من دماس
لابتوب
اي فون
شاشة تليفزيون
مجرد ما تدخل مقر الشركه هتستلم جائزه من الخمسه دول
قلتله اكيد ولا اشتغالة
قالي يا افندم احنا الشركه الوحيده اللي متعاقدين مع الجيش عشان نقف علي كل البوابات الخاصه بالجيش
قلتله تمام
اداني كتيب شكله بصراحه شيك واداني وصل مكتوب فيه ليه خمس كوبونات سحب علي سياره وجائزه فوريه عند الوصول
طيب أمتى
قالي بكره الساعه ٧ مساء
قلتله تمام بس خلي بالك انا هاجي من الاسكندريه مخصوص لو طلعت اشتغاله هعمل فيكو محضر
قالي يا فندم حضرتك هتيجي هنا بعد اسبوع وتسأل عليا انا اسمي فلان الفلاني وهتراضيني مش اقل من خمسه آلاف جنية
قلتله ليه ان شاء الله
قالي حضرتك احنا كل ٦شهور عندنا سحب علي سياره النترا يتسابق عليها ٢٠ اسره ب ٢٠ كوبون انت لوحدك معاك ٥ كبونات يعني فرصتك في الفوز بالسياره بنسبة ٢٥ % واكيد ده بيأهلك عن غيرك
قلتله لو الكلام ده صحيح انا هديلك عشره مش خمسة
طبعا نسيت اقولكم أن مراتي وبنتي كانو معايا وقالي برضه شروط الموضوع لازم يكون زوج وزوجه
وخلصنا ومشيت وخد البطاقة الشخصيه بتاعة مراتي علشان يجبرنا نروح الشركة
طبعا انا عايز اقولوكو أن انا من اسكندريه وكنت رايح ٦ اكتوبر احضر فرح واحد صاحبي ورجعت اسكندريه تاني وتاني يوم سافرت القاهره ومعايا مراتي وبنتي
علي العنوان اللي الراجل عطاهولنا
شركة مقرها في القاهرة تحديدا الدقي وللعلم عرفت انهم كل شهر بيغيروا المكان
خليك في اللي جاي عشان اللي جاي كله مفاجاءات
وصلنا للعنوان ودخلنا الفيلا واستقبلتنا واحده موظفة الأستقبال وطلعنا الدور التاني تحس كده انك داخل مطعم عباره عن طرابيزات وكل راجل وامراته قاعد معاهم مندوب
ملخص القاعده واللي حصل فيها هقولوه باختصار عشان خد وقت حوالي ٣ ساعات
مطلوب مني اشترك في برنامج سياحه عباره عن ١٤ ليله سنويا لمدة ١٥ سنه بمجموعة فنادق وقري سياحيه داخل مصر وخارجها بمقدم حوالي ٢١٥٠٠ وقسط شهري ٨٥٠ لمدة ٦٠ شهر بإجمالي تكلفه ٧٢٥٠٠
وطبعا زينا زي باقي الناس رفضناوجينا نمشي قالولنا استنو ليكو هدية
وطبعا احنا عارفين نوع الهديه اكيد حاجه من الخمس هدايا
تخيلوا الهديه طلعت ايه ايه ايه
برواز صوره ١٠ سم لا يتجاوز ثمنه ٥ جنية
فضلنا نزعق وانتو قايلين خمس هدايا وعملنا هيصه جامده طلع المدير فضل يزعق واحنا نزعق وفي الأخر حاول يراضينا وادانا سخان شاي كاتيل وبرواز كبير
طبعا انا بنقل تجربتي ليكو عشان محدش يقع في نفس المشكلة
وبلاش لو سمحتو تقول لي ما انت اللي غلطان حد يصدق ناس زي دي
هرد عليك واقولك اسلوبهم ومعاملتهم تحسسك مدي أنهم صادقين وبتتعامل معامله اكنك في فندق ٧ نجوم حاجه كده اخر احترام
ويكرر تاني انا بنقل تجربتي ليكو عشان محدش يقع في نفس الفخ
دمتم بخير
منقول عن قصة حقيقية خلوا بالكم ياجماعه دى ناس مفيش عندهم أي أحساس بالناس نهائي
أقرا أيضيا :-
الربح من خلال النت2021 | تعرف على طرق وكيفية الربح من خلال الأنترنت2021
أفضل 10 صناعات يمكن لشركات تحسين محركات البحث (SEO) أن تساعد في نموها
بناء روابط خلفية لزيادة SERPS الخاص بك
أهم عشر خطوات لإعداد نفسك للتسويق عبر الإنترنت 2022
الرسائل النصية القصيرة المجانية: أهمية التسويق عبر الرسائل النصية القصيرة في عالم اليوم التنافسي