شرح تفصيلي عن استلام الوحدة السكنيه وتوصيل الخدمات.
هنفكر الناس تاني علشان الاسئلة الكتيييرة اللي بنشوفها عن الاستلام وطريقه التقديم علي الخدمات.
بسم الله الرحمن الرحيم
أولاً استلام الوحدة السكنيه
حضرتك هتجيب العقد من البنك اللي تابع ليه.
وتطلع علي الجهاز خلف خدمة المواطنين
هتصور اول ورقتين من العقد وتكتب رقم موبايلك عليها وصورة البطاقه الشخصيه وكمان صورة بطاقه الزوجه واخر ايصال دفع القسط للبنك.
هتسلم كل ما سبق ذكرة للشباك خلف خدمه المواطنين هيديلك ورقه تدفع في الخزنه ٢١٦ جنيه رسوم سنة نظافه وتسلمه تاني الوصل هيديلك محضر الاستلام.
هنا بقي نقطه تحول تانيه وركز في اللي جاي دة
متمضيش علي المحضر إطلاقاً الا بعد استلام الوحدة.
هتروح علي الشركة اللي حضرتك تابع ليها اي ان كانت.
هتقابل المهندس المسؤل من قبل شركة التنفيذ هتقوله عاوز استلم الشقه بتاعتي .
تاخد معاك بقي عدد ٣ صورة لمحضر الإستلام
وصورة الورقه اللي هتاخدها من الجهاز مع المحضر وصورة بطاقتك الشخصيه كل حاجه ٣ صور.
المهندس هيبص في المحضر ويشوف العمارة اللي حضرتك تابع ليها خلصت تشطيب ولا لسه
لو خلصت هيطلع معاك المهندس تشوف الشقه
تخلي بالك بقي وانت بتستلم كويس من كل حاجه
انت مش واخد الشقه ببلاش انت دافع دم قلبك فيها ومش من المفترض انك تروح تصلح وتكمل تشطيبات مش ناقصه غرامه .
هتبص علي السيراميك كويس بلاطه مكسورة او كدة تطلب ترميمها
والشبابيك والابواب والالمونيتال والزجاج والسباكه والكهرباء تجرب كل حاجه بنفسك وتفتح المياه والكهرباء .
اي خلل تطلب التصليح منهم
لو حاجه بسيطه هيصلحالك في نفس الوقت
ولو كبيرة هيديلك ميعاد تيجي فيه تستسلم وان شاء الله هتتحل .
استلمت بقي الشقه وتمام هنا بقي تمضي علي المحضر وتخلي المهندس يمضي ومندوب الجهاز اللي بالموقع كمان يمضي ركز علشان ما ترجعش من الجهاز تاني علي امضي
مهندس الشركه المنفذة يمضي
وبعد كدة مهندس الجهاز المندوب هتلاقيه هناك في مكتب الشركه.
تمام كدة مبروك ياعم الشقه وربنا يجعلها فتحة خير عليك وعلي واولادك يارب .
هتروح بقي بعديها ممكن في نفس اليوم او في يوم تاني مش هتفرق ومفيش مشكله
علي الجهاز تاني المبني اللي جمب خدمة المواطنين هتروح علشان تختم المحضر ختم النسر هتطلع الدور التاني وتديهم المحضر وبطاقتك الشخصيه هتمضي منهم وتنزل تحت خلف المبني علي طول هتسأل علي الارشيف هناك هتختم ختم النسر وبعدها تروح تصور المحضر صورتين بعد الختم وتطلع للنفس الشخص اللي اخد منك البطاقة ومضي علي المحضر هتديله الصور وتاخد بطاقتك.
خلصنا مرحله التسليم تمام مبروك كمان مرة
ثانياً الخدمات او المرافق زي ماتحب تسميها.
مبدئياً صور المحضر بعد الختم وكمان البطاقه عشر نسخ علشان في كل مكان هتحتاج الصور دي وانت بتقدم.
اول حاجه هتطلع علي شبكة المياه هتشتري عداد ٣/٤ بوصه تمنه ٥٠٠ جنيه ورسوم اشتراك المياه ٣١٠ جنيه .
وتاخد منهم جواب التعاقد علي الكهرباء والمخالصه علشان تقدم علي معاينه للغاز بالمرة ولا انت غاوي مشورة وخلاص مرة واحدة
هتطلع بقي علي الجهاز مبني خدمة المواطنين وتقدم علي الكهرباء وتطلب كمان طلب تقديم علي المعاينه لتوصيل الغاز دة هيبقي خلف مبني خدمه المواطنين اه نفس المكان اللي استلمت منه المحضر
الكهرباء
١١٦١.٥
والمعاينه بتاعته الغاز
٥٨ جنيه + رسوم سنه نظافه دة طبعاً لو مستلم في ٢٠١٧
هتدفع سنة تانيه او يدينا ويديك طولة العمر لو استلمت في ٢٠١٨ وهتقدم علي الخدمات في ٢٠١٩
اما لو استلمت في ٢٠١٨ وهتقدم في نفس السنه
يبقي مش هتدفع رسوم نظافه وانت بتقدم علي الخدمات.
تمام كدة الحمد لله.
بعد ماتخلص بقي لو عاوز تقدم علي الغاز
تطلع علي الأردنيه وتقدم تاخد معاك صورة المقايسه بتاعه المياه وتقدم ٢١٦٠ جنيه دة للكاش.
اما القسط محتاجين وصلين مرافق ودة طبعا بعد ماتقدم على الكهرباء وتستلم الكارت هتشحنه من الشبكة وتاخد وصل بالشحن وبعدها تفرغه فى العداد وتشحن تاني من اى حد عندة ماكينه فوري وتاخد الوصل بتاع الشحن وكدة معاك وصلين وتقدر تقدم عادي.
تعالى رايح فين استني بس انت نسيت حاجه مهمه
بعد اسبوعين من التقديم علي الكهرباء في الجهاز
هتطلع علي شبكه الكهرباء الجديدة اللي عند صانيه مصر الخير
هيكون الجواب بتاع حضرتك وصل عندهم
وتاخد معاك كل الورق والإيصالات بتاعة دفع الرسوم
وتتعاقد هناك علي الكهرباء من غير فلوس طبعا
اه شفت ههههه أخيراً من غير فلوس
لا يافالح انت دفعت الفلوس مقدماً في الجهاز.
بس بياخدوا ٥٠جنيه وانت بتستلم الكارت بتاع العداد.
يلا طولت عليكم وكمان طريقه الشرح طويله
بس ياريت اكون افدت حضراتكم.
بالتوفيق للجميع.
وأي إستفسار انا تحت أمركم علي الرحب والسعة.